الشاعر/ راضى على احمد حسين
سوهاج – طهطا – عرب بخواج- 0161259368
عضو نادى الأدب بطما
حوادث الطرق
بلاش السرعة بلاش جنون وليه أرواحنا عليك بتهون؟
زيادة ركاب بتزنق فينـــــا كإنى طرد معاك مشحون
داخل سبا ق ياحبيبى فى سرعه ولا َّ بتجرى هارب مسجون؟
أوعى تقول خايف على رزقى رزقك ليك مقسوم هيكون
ياما بيقتل طيشك نــــــاس وأديك بتخالف برضه قانون
ليه بتيتم لينا عيالنــــا؟ والتانى معوق أديه مركون
ماشى ع الخط تهزر تلعب وتقول بالسرعة أنا مفتون
احذر غلطة تيجى من غيرك ولا َّ فرامل لحظة تخــون
واخدها مقاولة صـــد ورد دا كترالسهر بيعمى عيون
أوعى تقول أقساطى كتيرة عليَّا ضريبة كمان وديون
أوعى تكون ماشى ومتخدر بيرة خمرة حشيش أفيون
ولا َّ تقول سواق متـــمكن مغرور بنفسك شر ظنـون
وماشى كمان بتشتم غيرك خلـِّى قيادتك ذوق وفنـون
واخدها تلكس تصدع فيـنا ياما ناس محتاجه سكون
إيد بتلم الأجرة يا سيــدى والتانية ماسكة كمان تليفون
إستغلال فى الأجرة حقيقى مابترحمش أى زبــــون
تسجيل أغانيك هابطه بيزعجنا مش بتراعى شعور محزون
علشان تسمع راكب بـينده بيقولك وايلى بتاخده زتون
أرواح ناس وياك مش لعبه أغلى حاجه الروح فى الكون
امشى هادى أكيد راح توصل دا حكمه قالها واحد موزون
مهما كان مشوارنا بعــــيد مش لازم سرعه تكون مليون
أرواح الناس دا أمانة فى ايدك تتهاون تبقى أكيد ملعــــون
مصدر دخلك رزق عيالك حافظ يا ابنى عليه وصـــون
لمَّا أوصل بيتى بسلامــــه هادعيلك أنا وهكون ممـنون